Manyang meuhalak pucak Seulawah

Leubeh lom ceudah Gunong Geureutee

Wahe kawom lon kawom meutuwah

Taubat bak Allah meubek le lale

Nanggroe Aceh nyoe jinoe meutuwah

Rata daerah neukalon lagee

Meuseujid kale rata daerah

Meunyo meunasah geutamah bale


Meuseujid ubit jinoe kaluwah

Meutamah tamah keu binteh batee

Teutapi ureueng kureueng geulangkah

Aleh pue salah na saket ulee ?

Meugreb ngon insya hana pue peugah

Lale sileupah bak jambo keude

Nibak jambo soh meupoh beurakah

Meutham tham kisah ngon inong balee

Nibak meuseujid Hai Ya’Alassalah

Bak keude Lem lah geu adu batee

Nyoe dum keuh bagoe adoe meutuwah

Seuramoe Mekkah sang sang kalayee

Umpama buleuen kon le limong blah

Ka seupot leupah atawa reudee

Nanggroe bit peungeuh deuh taeu leumah

Nyang seupot leupah nyang tan eleumee

Ka habeh laloe adoe meutuwah

Aneuk ngon ayah jinoe kalalee

Ibadat hanle jahe meutamah

Rata daerah laot deungon glee

Dak na Peusantren dum luwah luwah

Jareueng soe langkah meuhadap guree

Hanle soe kira jinoe dum kasah

Meupoh beurakah nyang na tiep watee

Haleu ngon hareuem bandum jiempah

Hanle soe teugah jinoe kateuntee

Di aneuk dara peulom lon peugah

Keuma ngon ayah hanle jimalee

Dikeu yah ngon ma hana pue peugah

Dada jipeuhah rab deuh boh meunjee

Boh pha uluwa rata kaleumah

Sileuweu meuklah leumah urat lhee

E Ya Ilahi pakriban ulah

Seuramoe Mekkah jinoe han le bee

Kon bangsa aseng kayem jilangkah

Jak peugot ulah meulagee lagee

Ureueng droe tanyoe nyang meunoe ulah

Pubuet nyang salah rata kateuntee

Meunyo hana jeut bak ma ngon ayah

Dicari ilah meulagee lagee

Kadeuh takalon rakan meutuwah

Sayang sileupah Aceh kalayee

Layee deungon bak rusak ngon patah

Rakan meutuwah hana le meubee

Padum na sayang rakan meutuwah

Ingat ube drah hai bungong keumbee

Jaga nama droe adoe meutuwah

Seuramoe Mekkah bek tabri malee

Peusantren kale rata daerah

Le Peumerintah geuyue meuguree

Beudoh wareh lon jak beut beubagah

Jalan kaluwah meubek le lale

Meunan cit bagoe nibak meunasah

Beuna kuliah lam tiep tiep watee

Peureunoe laju ibu ngon ayah

Bek dudoe te ulah hana eleumee

Meutan eleumee rakan meutuwah

Sayang sileupah geutanyoe malee

Malee didongnya atra tan be drah

Malee bak Allah hana eleumee

Rakan boh hate kande meutuwah

Bek raya peugah bak lampe keude

Bek le meu ato ek nam dua blah

Meubek dok leupah peu lumpoe dikee

Hai adoe payong kawom saudara

Bak buet tan laba bekle ta seudee

Bek le adoe out bak buet tan laba

Sayang lageena oh gob eu malee

Adat istiadat beuthat tajaga

Hormat beuna keu guree guree

Ayah hai aneuk tapeumeulïa

Meunan cit keuma bek tabri malee

Meunyo kageutham le ayah ngon ma

Pateh digata bek le that lagee

Tapubuet suroh peujeuoh mungka

Gata saudara le ureueng malee

Sabab payah that poma peulara

Bak geu meu jaga hana pre watee

Dalam kandongon sinan phon mula

Phon phon dipoma saket lam ulee

Umu sibuleuen geukandong gata

Buleuen kedua sampee troh baklhee

Bak buleun keu peut hanjeuet takira

Poma digata teu lape lape

Bak buleuen limong bingong tiep masa

Tuboh anggota sang sang ka layee

Bak buleuen keunan meunan cit pula

Ta eu dipoma han ek bot ulee

Bak buleuen tujoh layoh anggota

Campli ngon sira gelhap boh jambee

Bak buleuen lapan ba dan meugeunta

Poma digata han ek grak ulee

Buleuen sikureueng meulheueng bak kira

Laju dipoma tuboh geuh layee

Poma pih saket menyak karab na

Nyaweung keluwa rasa kateuntee

Seupot ngon seupeut di aneuk mata

Bak lehe gata nyaweng sang padee

Oh ban kalahe gata eluwa

Bidan keurija geurah ngon ulee

Lheuh geupeusuci badan digata

ngon sigra sigra balot lam tumpee

Dijamok geulet pijet geujaga

Wahe aneukda hana pre watee

Mulai manyak poma useuha

Poma meujaga hai bungong keumbee

Oh watee rayek geujok sikula

Lagi sireuta geujok bak guree

Geuyue meununtut geuyue beuet sigra

Supaya gata ngat na eleumee

Oh watee rayek teuma digata

Bek taseuot ma meukeutee keutee

Manyang meuhalak Puncak gle Judah

Leubeh lom ceudah gunong Geureutee

Oengon seubab nyoe adoe meutuwah

Jaga Daerah bek tabri layee

Tapubuet suroh peujeuoh teugah

Nyang larang Allah bek tapeureuelee

Nanggroe geutanyoe jinoe that meugah

Nanggroe meutuwah leupah mangat bee

Nanggroe ube ok wase le leupah

Bukon beurakah haba lon bri thee

Maka deungon nyoe jinoe lon peugah

Nanggroe nyang meugah bek tabri layee

Meunan cit didroe hai kawon ayah

Aneuk neupapah neujok bak guree

Nue neu euntat bak beuet beu bagah

Keudeh bak Dayah yue jak u balee

Meu bek le lale adoe meutuwah

Laju takeubah aci ngon boh lhee

Ek lhee ngon boh peut kajeuet takeubah

Ta boh beubagah bek meuho euntee

Bek sayang adoe seuramoe Mekkah

Oh trh gob langkah tanyoe bek malee

Oh di eu le gob malee si leupah

Seuramoe Mekkah meugah gob teubee

Oh ta eu ureueng jareueng si leupah

Suroh ngon teugah pih hana meu bee

Di ureueng inong pih saboh ulah

Ya Masya Allah meu asek ulee

Ulee tan meutop teu ot dum leumah

Sayang sileupah hana le malee

Malee hana le aneuk ngon ayah

Seuramoe Mekkah sayang kalayee

Allah E Tuhan sayang sileupah

Aceh bek sosah rakyat bek lale

Di ureueng agam pih meunan ulah

Ubak meunasah hana le meu bee

Mugreb ngon Insya hana pue peugah

Lale geupeugah haba prang dilee

Wahe Wareh lon kawom meutuwah

Seuramoe Mekkah jaga tiep uroe

Meukon droe keudroe adoe tappah

Gob laen payah tanyoe dipangkee

Seumbahyang limong habeh takeubah

Peu cit tapeugah droe teuh le eleumee

Pakon cit yang jroh rot teh nyang ceudah

Bak buet nyang salah taboh lam abee

Oh noe wasiet lon sion lon peugah

Pateh amanah haba lon dungee

Pegarang

SYEH RIH KRUENG RAYA

Banda Aceh, 4 – Januari 1985